ليلة المحشى

اقترح عبد الله ان نطبخ محشى
وكانت فكرة مهببة والحمد لله على السراء والضراء
مش عايز افتكر الصراع اللى دار بين المتواجدين على الفكرة
كنا خمسة أفراد أصغرنا يتعدى الثلاثين وأكبرنا يقترب من الستين
بمجموع أعمارنا نكون قد أكملنا قرنين  من الزمان على تلك الفكرة
وابتدأ العمل بكل جدية
الكرنبه كان شكلها جميل وعبد الله بيخبط عليها كده تعمل صوت يجنن يعنى هتكون حلوة
زى بالضبط لما كنا بنشترى بطيخة يقوم البياع مخبط عليها وهو ماسك السكينة ويقعد يهددك
افتح علشان تشوف
تقول له لا خلاص امرنا لله سيبها وانا هتصرف فى البيت

احضر على الصغير الحلة الكبيرة لتستوعب الكرنبه بعدما قام عبد الله بفصل كل الاوراق عن بعضها
انا عارف هتكون ليلة سوده وطويلة كل واحد نفسه ينفذ فكرته
على الكبير عايز نسلق الورق سلق خفيف يدوب لما الميه تغلى نحط الورقه ونشيلها على طول
عبد الله هو المسئول عن تجهيز المواعين وغسيل كل حاجة فهو خبير بالنظافة بغض النظر طبعا عن انه بطيئ وبيغسل الحاجات بضمير زايد لدرجة تقرف
وعشماوى مفروض هوه المسئول عن لف المحشى
وانا قررت اقوم بالطهى بعد ما يخلصوا

وبدأ عبد الله فى غسيل الأرز أولا وبالتوازى يقوم عشماوى بتقشير البصل بكميات كبيرة حوالى كيلو تقريبا وعلى الصغير بيشغل الخلاط على الطماطم تحس اننا بدأنا معركة وليس لها قائد وكلنا كنا قائد والتفاصيل كتيرة جدا واستمرت من الساعة 11 مساء الأحد  الى الثانية والنصف من صباح الاثنين والخبط فى الحلل شغال والتقطيع فى البصل والخضرة المطلوبة وحاجات كده ملهاش لازمة تهيج الموقف ويختلف القادة  ويشتد الخلاف على اتفه سبب
- صحيح نشترك جميعا فى هدف واحد لكن نختلف جميعا فى تنفيذه -
ونحن نشترك جميعا فى مجرد أمنية انجاز وتجهيز المحشى بس وعينك لا تشوف الا النور فى الهياج على مراحل التنفيذ حتى لو كانت فكرة ان البصل مفروض يتقطع الأول يروح قائد تانى مش تخصصه البصل يعترض ويؤكد ان المفروض الخضرة أولا ويشتد الخلاف وعشماوى مستنى أى اتفاق على أى وضع
على الكبير  فرحان بالهيصة وملوش أى دور سوى انه يفتح موضوع نهيج عليه كلنا فيسكت ويجهز لنا الشاى
وعلى الصغير قرر الانسحاب  للنوم
وكل شوية عبد الله يسألنى ورق الكرنب استوى والا لسه تعالى شوف وانا طبعا كخبيراروح اشوف
وبدأنا فى تجهيز الخلطة المطلوبة بوضع البصل على النار والتقليب المستمر
البصل كتير يا عم عشماوى
يرد علينا المحشى بيحب البصل
يرد عبد الله مش مشكله المحشى بيحب ايه احنا اللى هناكل
مشكله بجد
نضيف عصير الطماطم على البصل
يأتى صوت عشماوى محذرا ان نضع الخضرة قبل العصير
نخبره بأننا فعلنا ذلك وانت لم تعترض ثم ما الفرق بين ان يوضع العصير قبل الخضرة أو العكس
اترك الحلة لعبد الله ليقلب لنا الخليط
وأجلس للتدخين متخيلا طعم اصابع المحشى بعد الطهى وانا اثق فى قدرات عشماوى بلف الأصابع
يأتى لنا الخبر بأن الورق لن يصلح لانه مهرى او مسلوق كتير ومتقطع
انا عارف انها ليلة مش هتفوت اصلا
يا عم اعمل اى حاجة الساعة قربت على اثنين الصبح وحرام كده
يتبرع على الكبير بلف المحشى
خلاص الموقف جاهز يا جماعة
ومع كل صباع يسمعنا عشماوى قصائد التأنيب لاننا سلقنا الورق اكتر من اللازم
اصلا احنا منعرفش اللازم وافتكرنا ان هوه كده
يرد يبقى كنتوا سيبوا الشغل
شغل ايه ياعم دا محشى
عموما خلص اللى انت تعرف تخلصه والباقى انا هتصرف فيه
ولم ينجز عشماوى سوى ما يقرب من 30 صباع بطلوع الروح واستأذن فى الذهاب للنوم
وبقى معى عبد الله فقمنا بتقطيع الورق المهرى وخلطه مع الرز كطبقات فوق بعضها
مش مهم يا عبد الله ان المحشى يكون صوابع
يضحك
بجد مش مهم
برضه يضحك ويستفسر عن المهم
والمهم طبعا الطعم
طيب نشوف بكره المهم
بعد ساعة اتضح ان الحلة وما بها من خليط المحشى بأوراق الكرنب المهرى مع الأرز المعجون أسهل
ولا تعطى الطعم المطلوب
بس دى أخر مرة اقوم فيها بالاشتراك فى اى مهزلة
منهم لله
اللهم لا نسألك رد القضاء ولكن نسألك اللطف فيه

-----------------
المنشور مش سياسى
------------------

سراب

إن كل خطوة تخطوها في الطبيعة حولك تجد فيها أثر الرحمة  والعناية  والرعاية
لم يقذف بنا إلى الدنيا لنعاني بلا معين كما يقول سارتر

إن كل ذرة في الكون تشير بإصبعها إلى رحمة الرحيم

حتى الألم لم يخلقه الله لنا عبثا إنما هو مؤشر وبوصلة تشير إلى مكان الداء  وتلفت النظر إليه
ألم الجسد يضع يدك على موضع المرض
وألم النفس يدفعك للبحث عن نفسك
وألم الروح يلهمك و يفتح آفاقك إلى إدراك شامل

فالدنيا ليست كل شيء و لا يمكن أن تكون كل شيء و فيها كل هذه الآلام و المظالم
وإنما لابد أن يكون وراءها عالم آخر سماوي ترد فيه الحقوق إلى أصحابها
ويجد كل ظالم عقابه

بالألم  ومغالبته  والصبر عليه  ومجاهدته تنمو الشخصية  وتزداد الإرادة صلابة و إصرار
و يصبح الإنسان شيئا آخر
غير الحيوان

فى ثوبها الجديد

تأتى فى أزهى صورها من وجهة نظرها
وليس مهما أن تتلاءم فى صورتها مع المنطق  ولا الذوق العام
من وجهة نظرها
تلك مسائل نسبية ترجع الى استدراكات وامكانيات مختلفة فى كل مراحل الحياة
ترسم ابتسامة صفراء وتدرى أنها فى مرحلة النقاهة بعد ساعات وأيام السهاد
تستحضر ما لديها من خيالات كانت فى السادس من ديسمبر فى العام الماضى وقول مدرب الرقص

شوفى يا حاجة سوسو
أنتى بتروحى شمال خطوتين وتهزى
وبعدين يمين وتهزى
وزيهم للخلف وبرضه تهزى
وفى الآخر قدام وتهزى

صعبة دى الهى ياشيخة اشوف فيك يوم ياهبلة يا بنت الكلب علشان الفن ينضف من الأشكال الواطية اللى انتى منها - غورى من قدامى دلوقتى ياسوسو الله يلعن شكلك
ياهبلة
وانتهى درس الرقص لهذا اليوم فعادت الحاجة سوسو الى بيتها بشموخ

واليوم تعود وصوت الماضى فى داخلها يحبطها

يلعن الفن وأيامه وكل من رأى فيك الفنانة
انت ياسوسو مجرد سوسو
الله يلعن أم الهجص
إيه القرف ده
ارحمنا يارب من سوسو وكل الآدميين على شاكلتها